TAKMARKINU NÁÐ!

Ég fór á vigtina í gær og viti menn. Ég hef náð þeim undraverða árangri að þyngjast um rúm 10 kíló á 3 mánuðum. Ég náði því að skríða yfir 100 kílóin og það má með sanni segja að þessi árangur sé mér hvatning í átt að 110 kílóunum.

Ég ÆTLA að ná þessu fyrir 1. jan.

Þá set ég svo í gang megrunarátak sem hefur alltaf virkað vel fyrir mig. Ég ætla bara að sýna og sanna fyrir feitu fólki eins og mér, að megrun er í rauninni skít-einföld. Ég hef kynnt þennan megrunarkúr fyrir allskonar fólki en allir hafa farið að flissa eins og einhver útvarpsflón þegar það heyrir hugmyndina.

Hún er nefnilega svo hrikalega einföld.

Seríós-kúrinn (eins og ég hef skírt fyrirbærið) gengur einfaldlega út á að það að öllum mat er beinlínis sleppt og Seríós er étið í staðinn. Fyrir allra mestu aulana má svo blanda einhverju ávaxtadrasli út í. Eftir svona viku kemur árangurinn í ljós. Kílóin bókstaflega fljúga af manni. Síðast þegar ég náði 110 kílóum tók það mig svona 3 vikur að slimmast niður í 90. Þetta er SVO einfalt og vegna þess að ég elska mannkynið og Íslendinga sérstaklega þá ætla ég að deila þessu með ykkur, alveg ókeypis.

Það fynda er að virkni Seríós-kúrsins er óumdeild. Allir vita að hann virkar. En feitu flissararnir sem hafna hugmyndinni og telja mig fara með spé, ættu að staldra aðeins við og hugsa málið.

Ég er nefnilega með kenningu sjáiði til.

Sá sem treystir sér ekki að éta gómsætt seríós í 3 vikur, getur ekkert verið í megrun og ætti að halda sig við snakkið. Vandinn við þetta fólk er að því finnst betra að éta en öðrum. Alveg eins og mér finnst brennivín betra en flestu fólki. (og er því löngu hættur að drekka eitrið). Seríós-kúrinn er ágætur til þess að flokka sauðina frá höfrunum. Þeir sem ná að éta seríós í 3 vikur, og þá sem VERÐA að fá sér einn sveittan sóðaborgara á Hlölla inn á milli. Seinni hópurinn verður alltaf í ruglinu og eyðir tíma sínum í vonlausa baráttu.

Til ykkar feitarabolla vil ég segja eitt. Notið Seríóskúrinn! Fáið ykkur smá ávaxtadrullu með og grænmetisdrykki. Þá þarf maður í rauninni ekkert meira. það er vel hægt að lifa á Seríósi þótt sumum þyki það alveg voðalegt.

Svo er annað mál og ískyggilegra. Það er hinn sjúklegi, já ég segi sjúklegi áhugi fjölmiðla af fitubollum eins og mér. Bissnessinn í kringum megranir er eiginlega meira vandamál en fitubollurnar sjálfar. (þessvegna er Seríóskúrinn svona góður. það græðir enginn á honum, hann svín-virkar og er hund-billegur) Allar sjónvarpsstöðvar hér í Svíþjóð eru fullar af allskonar fitubolluþáttum. Sýnt er frá einhverjum 25 ára sták sem er 400 kíló. Getur ekki hreyft sig og er á einhverju bleyjustigi. Étur bara „chrisps“ (snakk) allan helvítis daginn. Svo eru þættir (reyndar nokkuð góðir) þar sem einhver sænsk stelpa er að skoða svona líkamsímyndarmál, og tekur feitarabollurnar sérstaklega fyrir. Svo eru svona Dr.Fetma þættir á amk 2 stöðvum. Þar er sýnt fyrir og eftir hjáveitusaðgerð. Allir að grenja og svoleiðis. Ömurlegt hreint út sagt. Svo er náttúrulega mesti viðbjóðurinn. Biggest Looser. En sá þáttur er hliðstæður „SAW“ pyntingamynda-seríunni.

Þjóðfélagið ELSKAR að hata feitt fólk. Ekkert veitir vestrænu samfélagi meiri frjóun en að sjá 400 kílóa manneksju staulast út í Bónus og fylla innkaupakörfuna af snakki. Okkur líður vel að sjá þetta fólk þjást, fara að grenja og missa sig í snakkáti. Hinn fullkomni sigur þessa fituhatandi samfélags er þegar einhverjum mistekst að megra sig. Þegar einhver étur á sig gat eftir hjáveituaðgerð og er orðin jafn feitur og hann var fyrir aðgerðina. Sjálft Ypponið, fullnaðar sigurinn er svo að sjálfsögðu dauði fitubollunnar. þá er gaman. Því þar skapast svona virðulegur vetvangur fyrir að dissa fitubollunna. „Já, hún átti við vanda að stríða varðandi líkamsþyngd“ -„Já, blessunin, hún náði aldrei stjórn á þessu“.

Reyndar er að ég held hvergi sagt á læknaskýrslum að einhver hafi drepist úr offitu, frekar en það er skrifað að fólk drepist úr alkahólimsa.

Við erum hreinræktaðir óþverrar þegar kemur að feitu fólki. Viðbjóðslegt fólk. Drullusokkar. Sadistar. Illmenni.

Eina ástæðan fyrir því að ég ætla að grenna mig niður í svona 90 er sú að ég er bara að vera gamall. Þetta verður erfiðara eftir því sem árin færast yfir svo lifir maður lengur og svona. Og líður betur sem er kannski lykilatriði. Mér líður ekkert vel eftir einn snakkpoka eða tvo. Maður er í tómu rugli satt best að segja. Konan mín kvartar líka yfir því að kynþokka mínum sé ábótavant þegar ég er yfir kjörþyngd. Það eru ábendingar sem verða að skoðast vel.

Annars líður mér ágætlega í þessum 100 kílóum. Þetta dreifist ferlega jafnt yfir. Mér líður eins og ég sé alltaf í svona sjósleðagalla. Svo finnst mér svolítið gaman að því að steinsteypt gólf hristast og nötra þegar ég tilpla niður fæti. -Smá svona mikilmennksu eitthvað í því.

En núna er stefnan sett á 110 kílóa múrinn. -Ég rústa því inn með snakki og hreyfingarleysi.

16 comments On TAKMARKINU NÁÐ!

  • Ætlar þú að vera á þessum kúr það sem eftir er Teitur? Eða… hvað gerist svo? Ég er algjörlega mótfallinn matarkúrum, tel að góð hreyfing og sleppa ofátinu, sé það sem gildir. En til hamingju með kílóin 10.

  • Nei. ég verð bara á seríós-kúrnum í nokkar vikur. -Þá er þetta komið.

    Svo hleyp ég líka með.

    Þetta er einfalt. Maður á að brenna fleiri kalóríum en maður étur.

  • Þetta hljómar eins og snilld og ég mun prófa þetta í janúar. Ein spurning. Hvernig mjólk fer á hveitihringina? Létt eða bara ganz normal?

    Einar E.

  • Skiptir engu máli hvernig mjólkin er. Þetta léttmjólkur rugl er bara sölubrella. Notaðu bara þá mjólk sem þú ert vanur að kaupa.

    Léttmjólk er eittvað svona 1,5% fita meðan venjuleg mjólk er eitthvað aðeins meira. 3% eða eitthvað.

    3 prósent af einum lítra er nú ekki rassgat. Svo lítið að það skiptir engu máli.

    Bara að halda sig við Seríósið. Í morgunmat, hádegismat og kvöldmat. Svo til að maður fái ekki skyrbjúg þá er gott að drekka eitthvað svona ávaxtasull með.

  • Það gleymist oft í umræðunni hvað skyndibitinn er hollur fyrir sálina. Besti kúrinn er samt að horfa á Jóhönnu og Steingrím J og maður missir strax matarlistina og verður óglatt.

  • Mér virðist þetta ekki skynsamlegur kúr, þessi seríós kúr. Þú nærð kannski fljótt af þér fullt af kílóum, en svo tekur við fyrirbæri sem kallað er "jójó-effekt" . Kilóin koma eins og jójó, aftur tilbaka og þú verður jafnvel feitari, en fyrir seríós kúrinn.

    Hér í Þýskalandi vinsælasti kúrinn, ekki kúr hleldur mataræðisbreyting sem kölluð er: Schlank im Schlaf" eða "Að grennast í svefni." Og þetta svínvirkar.
    Þetta er í grófum dráttum svona: Þú mátt borða allt, en ekki samtímis.
    Á morgnana: Kolvetni og sætindi, en EKKERT kjöt, fiskur eða mjólkurvörur. Síðan eiga að líða 5 klst til næstu máltíðar, þar sem þú mátt borða allt. Aftur eiga að líða 5 klst. fram til næstu máltíðar og þá má EKKI borða nein kolvetni, heldur fisk, kjöt, egg, mjólkurvörur . Á nóttinni brennur maður á fullu og missir ca. 1/2 til 1 kg á viku.

  • Er hægt að kaupa Seríós í Svíþjóð?? Hér í DK er bara hægt að kaupa eitthvað dísætt Nestlé sull.

  • nei því miður. En það er bara hægt að notast við Korrflex. Svo er eitt alveg kostulegt.

    Þetta megrunar-korrflex er með aðeins meiri fitu en venjulegt korrflex

  • Gaur.

    Fólk sem lifir á Seríósi brennir öllum vöðvum. Vöðvar brenna fitu.

    Éttu frekar prótínríka fæðu, slepptu kolvetnisdrullunni og gerðu armbeygjur. Þá halda vöðvarnir sér.

    Ég fæ illt í upphandleggina að lesa þessar ráðleggingar frá þér.

  • Hvaða vitleysa er þetta? Seríós brennir upp vöðvum? Hvaðan fær þú það? Svo kom athugsemd um "svefn-kúrinn" þar sem maður grennist í svefni!

    Ekki hef ég neina trú á svefn-kúrum. Allt með forskeytinu "-svefn" er ávísun á e-a vitleysu.

    Það besta við Seríós-kúrinn er að maður þarf ekkert að reikna út eitthvað. Maður bara étur Seríós. Engin tímataka á hvenær maður át síðast, engin próteina-talning eða kolvetna keppni. -Bara seríós. Svo gerir maður þetta í svona 2 – 3 vikur og þá er maður komin í kjörþyngd.

  • Gangi þér þá bara vel með þinn seríóskúr, úr því að þú trúir svona á hann.
    En ég er í þessu "Schlank im Schaf" mataræði, eða þessum þýska svefnkúr, sem þú trúir ekki á og hann svínvirkar. Og hefur engan jójó-effekt!

  • má nota kornfleks í staðinn?
    eða korrflesk?

  • Snilldarblogg. Hvenær kemur video af þér að rappa Hypnotize með Biggie Smalls?

  • Hef mikla reynslu af seríós-kúrnum, virkar mjög vel. Fór einu sinni undir 50 kg á honum.
    Kv, Lára

  • Ég kannast við þetta, notaði kornflegs í staðin og léttist um 10 kg á smá tíma.

    Kveðja, Valsól

  • Er það ekki rétt hjá mér að það sé 3% af hverjum 100 grömmum sem gerir 30 grömm á hvern líter? miðað við 1.5% í undanrennu verða það 15 grömm á hvern líter af undanrennu?

    Kveðja Valsól

Comments are closed.

Site Footer