BALLIÐ ER BYRJAÐ

Fyrsti reikningurinn vegna kæru Gunnlaugs M. Sigmundssonar beið mín þegar ég kom heim úr fríinu á þriðjudaginn var.  Hann var nokkuð hár.  Hljómaði upp á 197.662. krónur.  Lögfræðingurinn minn heitir Sigríður Rut Júlíusdóttir og vinnur á stofu sem heitir Réttur.  Hún hefur verið með mér frá upphafi þessa máls ,allt frá því þegar mér barst fyrsta hótunin frá Gunnlaugi, hafði ég samband við hana.  Við erum nefnilega vinir á Facebook þótt við þekkjumst ekki neitt fyrir utan það.

Ég stend í þeirri trú, að ég geti ekki haft betri lögmann mér við hlið í þessu máli.   Nú má ekki misskilja mig.  Ég er ekki að kvarta yfir upphæðinni.

-Ballið er enfaldlega byrjað.

Fyrir þá  sem ekki vita, þá hefur miljarðamæringurinn Gunnlaugur M. Sigmundsson stefnt mér vegna skrifa minna, en þar var ég að rifja upp 13 ára gamlan greinaflokk Agnesar Bragadóttur í Morgunblaðinu.  Spurningunni hversvegna Gunnlaugur fór ekki í mál við Agnesi fyrir 13 árum er ósvarað en það verður gaman að fá úr því skorið í réttarhöldunum.

Ég hef neitað Gunnlaugi að skrifa undir eitthvað sem hann kallar „sáttaboð“ en í því fólst að:

…Ég viðurkenndi að grein Agnesar væri full af rangfærslum!
…..Svo átti ég að biðjast afsökunnar á ummælunum!
…….Og greiða Gunnlaugi og frú  300.000 kall!

Hérna er mynd af þessu makalausa plaggi.  Hérna er mynd af peningakröfu miljarðamæringsins.

Ég neitaði þessu auðvitað, enda meiðyrti ég engan.  Ég bauð samt sættir sem fælust í því að við Gunnlagur og kona hans, greiddum sem svarði einum mánaðarlaunum okkar í sjóð, sem svo við gæfum í eitthvað verðugt verkefni.  Kostnaður vegna þessara málaferla hlaupa á miljónum og því ekki úr lagi að hætta við þetta lögfræðistúss og reyna að snúa súrri stöðu í eitthvað uppbyggilegt. Hungursneyð í Afríku og miljónir fara í svona krapp.

-Ég á ekki heldur ekki fyrir þessu.

Ég er bara venjulegur maður með 4 og 5 ára stráka og 13 ára stelpu á Íslandi.  Ég hristi ekkert miljónir fram úr erminni eins og Gunnlaugur M. Sigmundsson sem er miljarðamæringur með framsóknartengsl.  Honum munar ekkert um þennan kostnað.  Svo segir mér hugur að Gunnlaugi sé slétt sama um sigur eða tap í þessu máli,  Tilgangi hans er í raun náð með því að setja á loft hamar sem hann hikar ekki við að berja fólk með, gangi það (að hans mati) of langt í gagnrýni sinni á hann sjálfan, og þá gerninga þegar þjóðaeigum var komið undir „rétta menn“.

Þetta mál vakti mikla athygli og þúsundir Íslendinga hafa lesið upprifjun mina um Kögunarmálið.  Á fyrstu stigum þessa máls hóf ég söfnum vegna lögfræðikostnaðar og hún hefur gengið vel.  Mig skortir orð yfir gæsku samborgara minna sem hafa styrkt mig í þessu máli.  Í raun má samt segja að þetta snýst ekkert um mig.  Þetta mál snýst um tilraun auðmanns til að þagga niður í umræðunni og sníða sögunna eftir hans eigin smekk og áherslum.

-Nokkuð sem ég tel svo stórkostlega geðbilað að ég er í alvörunni reiðubúinn til að fórna aleigunni í þessu máli.  Ef að Gunnlaugur vinnur, tapa ég öllu.  Hann fer fram á 3 miljónir auk vaxta og 654.720 auk virðisaukaskatts vegna birtingar dómsins í Morgunblaðinu. Hérna er sundurliðun fjárkröfunnar.

Hérna er svo pælingin bakvið 654.720 krónu kröfuna.

Ég hef nú stofnað sérstakan reikning vegna söfnunarinnar vegna málskostnaðarins í þessu máli.  Endurskoðandastofan BDOmun hafa umsjón með reikningnum.  Þetta er endurskoðendastofa sem mér lýst vel á.  Söfnunin hingað til hefur gengið vel en ég mun ekki eiga fyrir mikið fleiri reikningum eins og þeim sem beíð min eftir sumarfríið. Kostanður við þetta mál verður ekki undir einni miljón.  Og þá erum við að tala um sigur í málinu.  Ef ég tapa. Verð ég gjaldþrota.

Ég er bjartsýnn.  Ég er með dúndurgóðan lögfæðing, fína stragedíu og ég finn sannarlega fyrir meðbyr frá allskonar fólki.  Ég er stöðvaður út á götu og fólk óskar mér alls hins besta í tengslum við þetta mál.  Ég hef fengið ófá símtöl við allskonar fólk, fullt af tölvuskeytum og sumt af því sem ég hef upplifað í kjölfar þessarar kæru, ætti eiginlega heima í skáldsögu.

Svo á að búa til heimildamynd um málshöfðun Gunnlaugs á hendur mér.  Þetta mál sem byrjaði sem ómerkileg hótun í tölvupóstinum mínum hefur sannarlega undið upp á sig.

Ég veit ekki um Gunnlaug.

…. en ég er tilbúinn.


stuðningur

Site Footer